વિજ્ઞાનીઓએ ઉકેલ્યો 600 વર્ષ પૂર્વે થયેલી હત્યાનો ભેદ!

મેલબર્નઃ ઓસ્ટ્રેલિયન વિજ્ઞાનીઓએ એક આદિવાસી વ્યક્તિની હત્યાનાં 600 વર્ષ જૂના રહસ્ય ઉકેલવાનો દાવો કર્યો છે. તેમણે સંકેત આપ્યા છે કે, આ વ્યક્તિની તીક્ષ્ણ હથિયારો વડે હત્યા કરવામાં આવી હતી. લગભગ 1.7 મીટરની ઊંચાઈ ધરાવતા 25થી 30 વર્ષના આ આદિવાસી યુવક ‘કાકુત્જા’નો અવશેષ ઓસ્ટ્રેલિયાના ન્યૂ સાઉથ વેલ્સની ડાર્લિંગ નદીના કિનારેથી મળી આવ્યો હતો. ગ્રિફિથ યુનિવર્સિટીના રિસર્ચર્સે તેના મોતનું કારણ જાણવા માટે રિસર્ચ કર્યું હતું.

યુનિવર્સિટીના સિનિયર રિસર્ચ ફેલો માઇકલ વેસ્ટાવેના જણાવ્યાનુસાર, રિસર્ચમાં જાણવા મળ્યું હતું કે, આ સમુદાયના લોકો તીક્ષ્ણ તીર જેવા હથિયારોનો ઉપયોગ કરતા હતા. તીક્ષ્ણ હથિયારોથી આટલું નુકસાન થઈ શકે છે. રિસર્ચર્સનું માનવું છે કે, કાકુત્જાને મારવા માટે ‘લીલ-લીલ’ નામના વુડન વેપનનો ઉપયોગ કરવામાં આવ્યો હોઈ શકે.