1940ના દાયકા બાદ સૌથી મોટો ઘટાડો
અમેરિકાના અર્થતંત્રમાં 1940ના દાયકા બાદ આ સૌથી મોટો ઘટાડો છે જે આ વાતનું પ્રમાણ છે કે કોરોના વાયરસના રોગચાળાએ સમગ્ર વિશ્વમાં બિઝનેસ પર કેટલી માઠી અસર પહોંચાડી છે. તેના કારણે દેશમાં લાખો લોકો બેરોજગાર બની ગયા છે. વાર્ષિક આધાર પર જીડીપીમાં 32.9 ટકાનો ઘટાડો આવ્યો છે જે 1947 બાદ સૌથી મોટો ઘટાડો છે. આ દરમિયાન પર્સનલ સ્પેન્ડિંગમાં પણ વાર્ષિક આધારે 34.6 ટકાનો રેકોર્ડ ઘટાડો થયો છે. અમેરિકાના જીડીપીમાં પર્સનલ સ્પેન્ડિંગની બે-તૃત્યાંશ ભાગીદારી છે.
લાખો લોકો થયા બેરોજગાર
આ ત્રિમાસિક ગાળા દરમિયાન કોરોનાના કારણે બિઝનેસ બંધ થઈ ગયા અને લાખો લોકો બેરોજગાર બની ગયા. તેનાથી દેશમાં બેરોજગારીનો દર 14.7 ટકા પહોંચી ગયો છે. કોમર્સ ડિપાર્ટમેન્ટના અંદાજ પ્રમાણે જીડીપીમાં બીજા ત્રિમાસિકમાં આવેલો ઘટાડો 1947 બાદ સૌથી મોટો ઘટાડો છે. અગાઉ 1958માં આઈઝનહોવર એડમિનિસ્ટ્રેશન દરમિયાન જીડીપીમાં 10 ટકાનો ઘટાડો થયો હતો. અગાઉ જાન્યુઆરી-માર્ચમાં જીડીપીમાં પાંચ ટકાનો ઘટાડો જોવા મળ્યો હતો. ત્યારે હજી દેશમાં કોરોનાની શરૂઆત થઈ રહી હતી. આ રીતે અમેરિકન જીડીપીમાં રેકોર્ડ 11 વર્ષથી ચાલી આવી રહેલા વધારાની પરંપરા તૂટી ગઈ છે.
10 લાખથી વધુ લોકોએ બેરજોગારી ભથ્થુ માંગ્યુ
અમેરિકન અર્થતંત્રના સૌથી મહત્વના પિલર ગણાતા જોબ માર્કેટને પણ ઘણી માઠી અસર પહોંચી છે. નોકરી ગુમાવનારા 10 લાખથી વધુ લોકોએ સતત 18મા સપ્તાહે બેરોજગારી ભથ્થા માટે અરજી કરી છે. હત્યાર સુધી એક-તૃત્યાંશ નોકરીઓ ફરીથી શરૂ થઈ છે પરંતુ વાયરસ ફરીથી ફેલાયો છે અને તેના કારણે જોબ માર્કેટની ઝડપ પણ ધીમી પડવાની આશંકા છે.