કોરોનાનો બીજો રાઉન્ડઃ ઈટાલીમાં રેકોર્ડબ્રેક કેસ, ફરી સ્કૂલો બંધ થશે, આવશે રાત્રી કર્ફ્યુ

ડેઈલી મેલના અહેવાલ પ્રમાણે ઈટાલીમાં પ્રોફેશન અને અમેચ્યોર એમ તમામ પ્રકારની ફૂટબોલ મેચો બંધ કરવામાં આવી શકે છે. આ ઉપરાંત અત્યંત જરૂરી હોય તેવી મુસાફરીને જ મંજૂરી આપવામાં આવી શકે છે. જો, દેશમાં સ્થાનિક કેસમાં વધારો જોવા મળશે તો સરકાર હજી વધારે પ્રતિબંધો લાગુ કરી શકે છે.

યુરોપમાં સૌથી પહેલા ઈટાલીમાં કોરોનાનો હાહાકાર મચ્યો હતો. તેમાં પણ ફેબ્રુઆરીમાં લોમ્બાર્ડી સમગ્ર વિશ્વમાં કોરોના વાયરસનું એપિસેન્ટર બન્યું હતું. હવે અહીં ફરીથી કોરોનાના કેસ વધી રહ્યા છે. જેમાં એક જ દિવસમાં 2,000 નવા કેસ નોંધાયા છે. આલ્કોહોલના વેચાણને મર્યાદિત કરી દેવામાં આવ્યું છે. આ ઉપરાંત રમતો પર પ્રતિબંધ મૂકી દેવામાં આવ્યો છે અને બિંગો પાર્લર્સ પણ બંધ કરી દેવામાં આવ્યા છે. નવા નિયમ પ્રમાણે બાર્સમાં સાંજે છ પછી ફક્ત ટેબલ સર્વિસ જ ઉપલબ્ધ રહેશે અને જાહેર સ્થળોએ આલ્કોહોલના સેવન પર પ્રતિબંધ મૂકી દેવામાં આવ્યો છે. લોમ્બાર્ડીની જેમ કેમ્પેનિઆમાં પણ કેસ વધ્યા છે જેના કારણે બે સપ્તાહ સુધી સ્કૂલો બંધ કરી દેવામાં આવી છે.

યુરોપના મોટા ભાગના દેશમાં ફરીથી કોરોનાના કેસ વધી રહ્યા છે. જેના કારણે ફરીથી પ્રતિબંધો લાદવામાં આવી રહ્યા છે. જર્મનીમાં શનિવારે 7,840 નવા કેસ નોંધાયા હતા. ચાન્સેલર એન્જેલા મર્કલે લોકોને બિનજરૂરી મુસાફરી ન કરવાની, પાર્ટીઓ રદ્દ કરવાની અને શક્ય હોય તો ઘરમાં જ રહેવાની અપીલ કરી છે. યુરોપિયન માપદંડ પ્રમાણે જર્મનીમાં અત્યાર સુધી કોરોનાનો ચેપ અને મૃત્યુઆંક ઓછો રહ્યો છે. જોકે, મર્કેલે ચેતવણી આપી છે કે જો વર્તમાન ટ્રેન્ડ ચાલું રહેશે તો પ્રતિ દિવસ 19,200 જેટલા કેસ નોંધાઈ શકે છે.

ફ્રાન્સમાં પણ કોરોનાના રેકોર્ડ કેસ નોંધાઈ રહ્યા છે અને તેના કારણે નવા લોકડાઉનના નિયમોનું પાલન કરવા માટે 12,000 વધારાના પોલીસ જવાનો તૈનાત કરવામાં આવ્યા છે. છેલ્લા સાત દિવસમાં કોરોનાના 1,42,800 નવા કેસ નોંધાયા છે જે માર્ચથી મે દરમિયાન બે મહિનાના લોકડાઉનમાં નોંધાયેલા 1,32,430 કેસ કરતા વધારે છે. પેરિસ અને અન્ય આઠ મોટા શહેરોમાં રેસ્ટોરન્ટ્સ, બાર્સ અને સિનેમાઘરો 9 વાગ્યા સુધી જ ચાલુ રાખવામાં આવી રહ્યા છે.