છ વર્ષના છોકરાને થયો એક ભયાનક રોગ, હવે પોતાની માને જ નથી ઓળખી શકતો!

લંડન: જે રોગ કેટલાક લોકોને ઘડપણમાં થતો હોય છે તેવા એક રોગનો શિકાર છ વર્ષનો એક બાળક બન્યો છે. રિચી મિશેલ નામનો આ બાળક એવા અસાધ્ય રોગથી પીડાઈ રહ્યો છે કે તેના કારણે ધીરે-ધીરે તેની યાદશક્તિ ઘટી રહી છે. તે હવે તેની મમ્મીને પણ નથી ઓળખી શકતો. તેનું બોલવાનું પણ બંધ થઈ ગયું છે, અને હરવાફરવાનું પણ ઘટી ગયું છે. આ રોગ એટલો ઘાતકી છે કે તેના કારણે રિચી એક દિવસ શ્વાસ લેવાનું પણ બંધ કરી દેશે. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો સ્કોટલેન્ડના એક નાનકડા ગામડામાં પોતાની મમ્મી સાથે રહેતા રિચીની સ્થિતિ હજુ દિવસેને દિવસે ઓર ખરાબ થતી જશે. દુ:ખની વાત એ છે કે તેની મમ્મી પોતાના બાળકને ધીરે-ધીરે મોતના મુખમાં સરકતો જોઈ રહી છે પરંતુ પોતે તેને બચાવવા કશુંય કરી શકે તેમ નથી. રિચી પોતાને ઓળખે છે કે નહીં તે તો તેની મમ્મીને ખબર નથી, કારણકે હવે તે કશુંય બોલતો નથી. જોકે, તેમને એ વાતનો દિલાસો છે કે તેમનો લાડલો ‘મમ્મા…’ તો બોલી જ શકે છે. રિચી બેટન ડિસીઝનો શિકાર છે. આ રોગમાં દર્દીની યાદશક્તિ ધીરે-ધીરે ઓછી થતી જાય છે. તેના મગજની ક્ષમતા પણ ઘટે છે, અને દર્દી મોતની ગર્તામાં ધકેલાતો જાય છે. આ રોગ એવો છે કે તેમાં સ્થિતિ અઠવાડિયાઓમાં, મહિનાઓમાં કે પછી ક્યારેક વર્ષોમાં ગમે ત્યારે ગમે તે સ્તરે બદલાઈ શકે છે. દર્દી કેટલું જીવશે તે કહેવું લગભગ અશક્ય હોય છે. બેટન ડિસીઝ એક પ્રકારનો દુર્લભ જિનેટિકલી વારસાગત રોગ છે, જેમાં ન્યૂરોડેગ્નેરેટિવ ઈફેક્ટ્સ (Neurodegnerative effects)નું સર્જન કરતાં કોષોમાં વેસ્ટ ભેગો થઈ જાય છે અને તેના કારણે મગજમાં આ ક્ષતિ સર્જાય છે. નવજાત બાળકને આ રોગ થયો છે કે નહીં તેનું નિદાન કરવું લગભગ અશક્ય છે. હાલ તેની કોઈ દવા પણ ઉપલબ્ધ નથી. એકવાર આ રોગ થયાનું કન્ફર્મ થઈ જાય ત્યારબાદ દર્દી છ થી 13 વર્ષ સુધી જીવી શકે છે.