સાઉદીના રાણીના ઘરમાંથી 4 કરોડનો માલસામાન લઈને ફરાર થયા ચોર

હિંદી ફિલ્મનો એક ડાયલોગ છે કે 'ચોરનો કોઈ જ ધર્મ નથી હોતો, તે ગમે તેને લૂંટી લે છે.' ફ્રાંસની રાજધાની પેરિસમાં આ ડાયલોગ એકદમ સાચો સાબિત થયો હતો. શું રાજા શું રાંક? ચોરે રાણીને પણ છોડ્યા નહોતાં. ફ્રાંસની રાજધાની પેરિસમાંથી એક એવા સમાચાર સામે આવ્યા છે. જે જાણીને ત્યાંની જનતા પણ સ્તબ્ધ છે. હવે થયું એવું કે અહીં રહેતા સાઉદીના એક રાણીના ઘરમાંથી જ ચોર આશરે 4 કરોડ રુપિયાનો સામાન ચોરીને છૂ થઈ ગયા હતાં.

આટલો મોંઘો સામાન શું હતો?
ધ ગાર્ડિયનના જણાવ્યાનુસાર , 47 વર્ષની રાણી ઓગસ્ટથી જ પોતાના આ એપાર્ટમેન્ટમાં નહોતી. જોકે, જ્યારે તેઓ પોતાના એપાર્ટમેન્ટમાં આવ્યા ત્યારે તેમણે જોયું કે તેમના કિંમતી ઘરેણાં, ઘડિયાળ અને કેટલીક બેગ ગાયબ છે. જેની કિંમત 4 કરોડ 76 લાખ રુપિયાની આસપાસ હોવાનું કહેવામાં આવે છે.

રાણીને લાગ્યો શોક
હાલ તો રાણીને આ ચોરીના કારણે ખૂબ જ શોક લાગ્યો છે. તેમની તબીયત એટલી બગડી ગઈ છે કે તેમને હોસ્પિટલમાં સારવાર હેઠળ ખસેડવામાં આવ્યા છે. હાલ તો પોલીસ સાથે પણ તેમણે કોઈ જ વાત કરી નથી. રાણીનું ઘર પેરીસના હાઈફોર્સ એરિયા એવન્યુ જ્યોર્જ 5માં છે. ચોર તેમના ઘરેથી 30 હરમસ બેગ, Cartierની ઘડિયાળ, હીરા-ઝવેરાત અને ફરની મોંઘી આઈટમ્સ ચોરી કરીને લઈ ગયા છે. હાલ તો પોલીસ ચોરને પકડવા માટે તપાસ કરી રહી છે.

પોલીસનું માનવું છે કે ચોર કોઈ જ જાતની તોડફોડ કર્યા વગર જ એપાર્ટમેન્ટમાં અંદર ઘૂસ્યા હતા અને હાથની કરામત બતાવી હતી. આ ઉપરાંત એક વ્યક્તિ પર પણ શક છે જે આ એપાર્ટમેન્ટમાં પહેલાથી જ રહેતો હતો. આ એપાર્ટમેન્ટની એક ચાવી તેના ઘરે રહેતી હતી પરંતુ થોડા સમયથી તે ચાવી ગુમ થઈ હતી.