યુવતીને લોકડાઉનમાં બર્ગર ખાવાની ઈચ્છા થઈ, ઘરની બહાર નીકળી તો ભરવો પડ્યો આટલો દંડ

કોરોના વાયરસની આ મહામારીમાં મોટાભાગના લોકોએ લોકડાઉનના દિવસોનો અનુભવ કર્યો હશે. લોકડાઉનમાં લોકો ત્યારે ગાંડપણ કરતા જોવા મળ્યા કે જ્યારે તેઓને બહારની ચટપટી અને મસાલેદાર વસ્તુઓ ખાવાની ઈચ્છા થઈ. આ પ્રકારની એક ઘટના ઈંગ્લેન્ડમાં બની કે જ્યાં એક યુવતીને લોકડાઉનમાં બર્ગર ખાવાની ઈચ્છા થઈ, પણ આ બર્ગર તે યુવતીને એટલું મોંઘું પડ્યું કે તમે વિચારી પણ નહીં શકો.

ઈંગ્લેન્ડમાં રહેતી 30 વર્ષીય યુવતીએ લોકડાઉનમાં બર્ગર ખાવા માટે આશરે 160 કિલોમીટરનું અંતર કાપ્યું અને આ માટે યુવતીને રૂપિયા 20,000નો દંડ ભરવો પડ્યો. ઈંગ્લેન્ડમાં રહેતી આ યુવતી તેની બહેનને સાથે લઈને બર્ગર ખાવા માટે ટૂ-વ્હીલર પર નીકળી પડી હતી. ત્યારે ત્યાં કોરોનાની મહામારીને ધ્યાનમાં રાખતા કડક લોકડાઉન લાગુ કરાયુ હતું. આ યુવતી બર્ગર ખરીદવા માટે ઈંગ્લેન્ડના એક શહેરમાંથી બીજા શહેરમાં ટૂ-વ્હીલર પર ગઈ હતી. પોલીસે તેને કુલ રૂપિયા 20,000નો દંડ ફટકાર્યો. લોકડાઉનમાં બર્ગર લેવા ગયેલી આ યુવતીને કુલ 70 દંડ ભરવા પડ્યા.

ત્યાંના એક ચીફ ઈન્સ્પેકટરે આ વિશે વાત કરતા જણાવ્યું કે અમે સમજી શકીએ છીએ કે લોકો ઘરની બહાર જવા માગે છે પણ એક વખત કોરોનાની આ મહામારી ખતમ થઈ જાય પછી તેઓ જ્યાં જવું હોય ત્યાં જઈ શકે છે. અમે તે લોકોના આભારી છીએ કે જેઓ કોરોનાની આ મહામારીમાં ઘરમાં છે અને આ રીતે પોતાનો અને બીજાનો પણ જીવ બચાવી રહ્યા છે. અહીં નોંધનીય છે કે ઈંગ્લેન્ડમાં કોરોનાનો નવો પ્રકાર સામે આવ્યા પછી લોકડાઉનનું કડકાઈથી પાલન કરાવવામાં આવી રહ્યું છે.