પાકિસ્તાનમાં હાફિજ સઇદના ખુલ્લેઆમ ફરવા પર અમેરિકા ચિંતિત

વોશિંગ્ટનઃ સંયુક્ત રાષ્ટ્રે આતંકવાદી જાહેર કર્યો હોવા છતાં લશ્કર-એ-તોયબા (એલઇટી)નો નેતા હાફિજ સઇદના પાકિસ્તાનમાં ખુલ્લેઆમ ફરવા પર અમેરિકાએ ચિંતા વ્યક્ત કરી છે. અમેરિકાના વિદેશ વિભાગના પ્રેસ કાર્યાલયનાં અધ્યક્ષ એલિઝાબેથ ટ્રુડોએ ગુરુવારે કહ્યું હતું કે, ‘અમે પહેલેથી કહેતા આવ્યા છે કે, અમે તેની (હાફિજ સઇદ)ની ગતિવિધિઓથી ચિતિંત છીએ.’

સઈદના પાકિસ્તાનમાં ખુલ્લેઆમ ફરવા અને ઇન્ટરવ્યૂ આપવા અંગે પૂછવામાં આવેલા સવાલના જવાબમાં ટ્રુડોએ આમ જણાવ્યું હતું. અગાઉ સઈદે કહ્યું હતું, કાશ્મીરમાં થઈ રહેલી હિંસાની નિંદા ન કરી અમેરિકા ભારતને ખુલ્લી છૂટ આપી રહ્યો છે. ગત આઠમી જુલાઈએ એક અથડામણમાં હિજબુલ મુજાહિદ્દીનનો આતંકવાદી બુરહાન વાની માર્યા ગયા બાદ કાશ્મીરમાં મોટા પાયે હિંસા થઈ હતી, જેમાં 38 લોકોનાં મોત થયાં હતાં. એલિઝાબેથ ટ્રુડોએ કહ્યું હતું કે, સંયુક્ત રાષ્ટ્ર સુરક્ષા પરિષદના નિયમ 1267 અંતર્ગત અલકાયદા પ્રતિબંધ સમિતિ દ્વારા સઇદ પર પ્રતિબંધ મુકાયો છે અને અમેરિકાએ તેની પર ઇનામ જાહેર કરેલું છે. ભારત પ્રત્યે અમેરિકાના વલણ અંગેના સઇદના નિવેદન પર અમે અસંમત છીએ, પરંતુ તેને લઈને અમે પાકિસ્તાન સરકાર સાથે સ્પષ્ટ રહ્યા છીએ કે, તે આતંકવાદી સંગઠનો અને તાલિબાની આતંકવાદનો નાશ કરે.’

કાશ્મીરની વર્તમાન સ્થિત પર ટ્રુડોએ ફરી એકવાર કહ્યું છે કે, ‘શાંતિપૂર્ણ ઉકેલ શોધવા માટે અમેરિકા તમામ પક્ષોને પ્રોત્સાહિત કરશે. અમે માનીએ છીએ કે, જમીન સ્તરે સ્થિતિ ઘણી જટિલ છે. પ્રદર્શનની સાથે સાથે સુરક્ષા દળોની પ્રતિક્રિયા વિશે સ્પષ્ટ જાણકારી પ્રાપ્ત કરવાની અમે હજી કોશિશ કરી રહ્યાં છીએ.’