રશિયા-યુક્રેનના સંઘર્ષ વચ્ચે અમેરિકાએ પરમાણુ યુદ્ધાભ્યાસ શરૂ કર્યો

રશિયા અને યુક્રેન વચ્ચે યુદ્ધના વધતા જતાં ખતરા વચ્ચે અમેરિકાએ પરમાણુ યુદ્ધ અભ્યાસ શરૂ કર્યો છે. યુક્રેન મુદ્દે રશિયાનો વિરોધ કરી રહેલા અમેરિકાનું કહેવુ છે કે આ યુદ્ધાભ્સાયનો હેતુ અમેરિકાની સેનાની પરમાણુ યુદ્ધની તૈયારીઓને પારખવાનો છે. બીજી તરફ બ્લેક ઓસિયનમાં રશિયાની નેવી પણ યુદ્ધ અભ્યાસ કરી રહી છે, જ્યારે એના 1 લાખ સૈનિકો યુક્રેન સરહદ પર આક્રમણ માટે તૈયાર બેઠા છે. અમેરિકાએ શરૂ કરેલા પરમાણુ યુદ્ધનો અભ્યાસ નિષ્ણાંતો માટે સવાલ પેદા કરી રહ્યો છે, કારણ કે આ યુદ્ધ અભ્યાસ રશિયા અને યુક્રેન વચ્ચે ઉભા થયેલા તણાવ વચ્ચે કરવામાં આવી રહ્યો છે. અમેરિકાના પ્રેસિડન્ટ સતત ચેતવણી આપી રહ્યા છે કે રશિયા કોઇપણ સમયે યુક્રેન પર આક્રમણ કરી શકે છે. આ કારણેથી અમેરિકાએ પણ હજારોની સંખ્યામાં પોતાના સૈનિકોને યુદ્ધ માટે તૈયાર કર્યા છે.
અમેરિકા જે પરમાણુ યુદ્ધ યોજના હેઠળ અભ્યાસ કરી રહ્યું છે એને 2019માં અપડેટ કરવામાં આવી હતી. જેમાં હવે આતંકવાદી સામે લડવાને બદલે મહાસત્તાઓ વચ્ચે થઇ રહેલી હરિફાઇ પર જોર આપવામાં આવી રહ્યું છે. અમેરિકાનું કહેવુ છે કે, જો દેશ પર પરમાણુ હુલો થાય તો થોડા ઘણા અમેરિકન સૈનિકો બચી શકશે અને જે બચી જશે એ દુશ્મન દેશ પર ત્યાં સુધી પરમાણુ હુમલો કરતાં રહેશે જ્યાં સુધી એ દેશ નષ્ટ ના થઇ જાય.

હાલમાં અમેરિકા અને રશિયા વચ્ચે તણાવભરી સ્થિતિ પેદા થઇ ચૂકી છે. રશિયાની સેના યુક્રેન પર હુમલો કરવાની સંપૂર્ણ તૈયારી કરી ચૂકી છે અને આદેશની રાહ જોઇ રહી છે. એવામાં અમેરિકા સહિત ઘણા પશ્ચિમ દેશો યુક્રેન પર રશિયાની કાર્યવાહીનો વિરોધ કરી રહ્યા છે. અમેરિકા આ મુદ્દે રશિયા પર પ્રતિબંધો મુકવાની ધમકીઓ પણ આપી ચૂક્યુ છે. બીજી તરફ રશિયા અમેરિકાના પ્રખર વિરોધી દેશ ચીન સાથે મહત્વની મુલાકાત કરી શકે એમ છે. બેઈજિંગ વિન્ટર ઓલિમ્પિકના ઉદ્ધાટન કાર્યક્રમમાં રશિયાના પ્રેસિડન્ટ વ્લાદિમીર પુતિન ચીન જઇ રહ્યા છે. ચીન માટે આ સમારોહ એશિયા સહિત આખી દુનિયા સામે શક્તિ પ્રદર્શન કરવાનો એક મોકો છે. આ સમારોહમાં રશિયા, ચીન અને પાકિસ્તાનના વડાઓ એકસાથે એકઠા થાય એવી સંભાવના છે. જે ભારત માટે પણ ચિંતાજનક બાબત છે.