'સોરી મમ્મી, હું મરી રહી છું. શ્વાસ લઈ શકતી નથી' દીકરીએ કર્યો છેલ્લો મેસેજ

બ્રિટનમાં બે દિવસ અગાઉ એક ટ્રક કન્ટેનરમાંથી 39 મૃતદેહો મળ્યા હતા જેને લઈને વિશ્વભરમાં ચકચાર મચી ગઈ છે. આ કન્ટેનરની અંદરનું તાપમાન શૂન્યથી પણ નીચુ હતું અને અતિશય ઠંડીના કારણે તેમના મોત નિપજ્યા હોવાનું સામે આવ્યું છે. બ્રિટન પોલીસના જણાવ્યા પ્રમાણે આ તમામ મૃતકો ચીનના નાગરિકો છે. પોલીસે ટ્રક ડ્રાઈવરની ધરપકડ કરી છે અને પૂછપરછ હાથ ધરી છે. આ દરમિયાન એક હ્રદય હચમચાવી મૂકે તેવી વાત સામે આવી છે. જેમાં 39 મૃતકોમાં સામેલ વિયેતનામની એક યુવતીએ પોતાની માતાને મેસેજ કર્યો હતો કે તે મરી રહી છે. ફામ થી ત્રા માય નામની યુવતીએ સંખ્યા બંધ મેસેજ કર્યા હતા જેમાં તેણે લખ્યું હતું કે તે પોતાની માતાને ઘણો પ્રેમ કરે છે અને તે શ્વાસ નથી લઈ શકતી અને મરી રહી છે. તેના પરિવારે દાવો કર્યો છે કે 26 વર્ષીય યુવતીએ વધારે સારા જીવનની શોધ માટે યુકે જવા ગેરકાયદેસર લઈ જતા લોકોને 30,000 પાઉન્ડ આપ્યા હતા અને તે વાયા ચીન થઈને યુકે જવા રવાના થઈ હતી. પોલીસે આ ટ્રકના માલિક દંપત્તીની ધરપકડ કરી લીધી છે અને તેની તપાસ જારી છે. પોલીસે જોઆન્ના માહેર અને તેના પતિ થોમસની ધરપકડ કરી છે. ફામ થી ત્રાએ છેલ્લો મેસેજ ટ્રક યુકેમાં દાખલ થઈ તેના બે કલાક અગાઉ કર્યો હતો. આ ટ્રક બેલ્જિયમથી યુકેમાં આવ્યો હતો. તેણે પોતાની માતાને મેસેજમાં લખ્યું હતું કે હું દિલગીર છું મમ્મી. મારો વિદેશ પ્રવાસ સફળ રહ્યો નથી. મમ્મી, હું તને ઘણો જ પ્રેમ કરું છું. હું મરી રહી છું કેમ કે હું શ્વાસ લઈ શકતી નથી. તેના ભાઈએ જણાવ્યું હતું કે તેની બહેને તેમને કહ્યું હતું કે તેઓ તેનો સંપર્ક કરવાનો પ્રયાસ ન કરે કેમ કે તેને લઈ જનારાઓએ કહ્યું હતું કે તે ફોન રિસિવ કરી શકશે નહીં. તેણે કહ્યું હતું કે તેની બહેન કેન લોક ખાતેના પોતાના ઘરેથી ચીન જવા રવાના થઈ હતી અને ત્યાંથી તે ફ્રાન્સ ગઈ હતી. તેમણે 19 ઓક્ટોબર પ્રથમ વખત યુકેની બોર્ડર ક્રોસ કરવાનો પ્રયાસ કર્યો હતો પરંતુ તેઓ ત્યાં પકડાઈ ગયા હતા અને તેમને પાછા મોકલી દેવામાં આવ્યા હતા.