રશિયા: ગંભીર બીમારીથી પીડાતા પુતિન ગર્લફ્રેન્ડના કહેવા પર આપી દેશે રાજીનામું?

મોસ્કો: છેલ્લા 20 વર્ષથી રશિયા પર 'શાસન' કરનારા રાષ્ટ્રપતિ વ્લાદિમીર પુતિન આગામી વર્ષના પ્રારંભમાં તેમના પદ પરથી રાજીનામું આપે તેવી સંભાવના છે. સૂત્રોએ દાવો કર્યો છે કે તેમની ગર્લફ્રેન્ડ, જિમનાસ્ટ અલિના કબીવા અને તેમની બે પુત્રીઓ દ્વારા પુતિનને રાજીનામું આપવાની અપીલ કરવામાં આવી છે. એવો દાવો કરવામાં આવી રહ્યો છે કે પુટિન પાર્કિન્સન (Parkinson) રોગથી પીડાઈ રહ્યા છે. તાજેતરના ફોટોગ્રાફ્સ બાદ પુતિનની બીમારીની અટકળો તીવ્ર બની છે.

મોસ્કોના રાજકીય વૈજ્ઞાનિક વલેરી સોલોવેઈએ બ્રિટિશ અખબાર ધ સનને જણાવ્યું હતું કે, રશિયન રાષ્ટ્રપતિની પ્રેમિકા અને તેમની બે પુત્રીઓ પુતિનને રાજીનામું આપવા દબાણ કરી રહ્યા છે. તેમણે કહ્યું, 'પુતિનનો એક પરિવાર છે અને તેનો રશિયન રાષ્ટ્રપતિ પર ઊંડો પ્રભાવ છે. પુતિન જાન્યુઆરીમાં સત્તા કોઈ બીજાને સોંપી શકે છે. તેમણે કહ્યું હતું કે, સંભવત: રાષ્ટ્રપતિ પાર્કિન્સનથી પીડાઈ રહ્યા છે અને તાજેતરની તસવીરોમાં તેમની માંદગીના લક્ષણ પણ જોવા મળ્યા છે.

ધ સનનાં નિષ્ણાતોના જણાવ્યા મુજબ રશિયન રાષ્ટ્રપતિ પીડાથી પીડાઈ રહ્યા હતા. પુતિનના હાથમાં દવાઓ હોવાનો પણ નિષ્ણાતો દાવો કર્યો છે. પુતિનના રાજીનામા અંગેની અટકળો એવા સમયે તીવ્ર બની છે કે જ્યારે રશિયન ધારાસભ્યો એક ખરડા પર વિચાર કરી રહ્યા છે, જેના હેઠળ ગુનાહિત કાર્યવાહીથી તેઓને આજીવન છૂટ મળશે.

આ નવું બિલ ખુદ પુતિન દ્વારા રજૂ કરાયું હતું અને જે મુજબ પુતિન જીવિત છે ત્યાં સુધી તેમને કાયદાકીય કાર્યવાહીથી છૂટ મળશે અને રાજ્ય તરફથી તમામ સુવિધાઓ મળશે. રશિયાની સરકારી ચેનલ આરટી અનુસાર, આ બિલ રશિયામાં સત્તાના હસ્તાન્તરણની નિશાની છે. આ પહેલીવાર નથી જ્યારે લોકોએ અનુમાન લગાવ્યું છે કે પુતિન પાર્કિન્સન્સ રોગ છે. સોલોવેઈએ કહ્યું કે ટૂંક સમયમાં નવા વડાપ્રધાન બનાવવામાં આવશે અને પુતિનના સંરક્ષણ હેઠળ તાલીમ આપવામાં આવશે.