WHOના ચીફે માન્યો PM મોદીનો આભાર, કોરોનાની વેક્સીનને લઈને બંને વચ્ચે થઈ ખાસ ચર્ચા

દુનિયાભરના લોકોને કોરોના વાયરસની વેક્સીન Covax મળી રહે તે માટે પોતાની પ્રતિબદ્ધતા દર્શાવનારા પ્રધાનમંત્રી નરેન્દ્ર મોદીની વર્લ્ડ હેલ્થ ઓર્ગેનાઈઝેશનના ડાયરેક્ટર જનરલ ટેડ્રોસ અધાનોમ ગ્રેબેયેસસે બુધવારે પ્રશંસા કરીને તેમનો આભાર માન્યો હતો.

WHOના ડાયરેક્ટરે કરેલા ટ્વીટમાં લખ્યું છે, હું દુનિયાભરના લોકો માટે કોવિડ-19 વેક્સીન COVAXના ઉત્પાદન માટે પ્રધાનમંત્રી નરેન્દ્ર મોદીની પ્રતિબદ્ધતા બદલ તેમનો આભાર માન્યું છું. આ મહામારી દુનિયા માટે મોટો પડકાર છે અને અમે ખભાથી ખભો મિલાવી કામ કરવા માટે સહમત થયા છીએ.

ટેડ્રોસ કહે છે, તેમણે પ્રધાનમંત્રી મોદી સાથે ટેલિફોન પર વાતચીત કરી હતી, આ દરમિયાન તેમણે પારંપરિક ચિકિત્સાના ક્ષેત્રમાં દુનિયાભરમાં જ્ઞાન, રિસર્ચ અને ટ્રેનિંગ સરળતાથી પહોંચાડવા પારસ્પરિક સહયોગને વધારવા પર ભાર મૂક્યો.

તેમણે એક અન્ય ટ્વીટમાં લખ્યું, પારંપરિક ચિકિત્સા ક્ષેત્રમાં દુનિયાભરમાં જ્ઞાન, રિસર્ચ અને ટ્રેનિંગ સરળતાથી પહોંચાડવા માટે પારસ્પરિક સહયોગને મજબૂત કરવાને લઈને થયેલી વાતચીત માટે પ્રધાનમંત્રી નરેન્દ્ર મોદીનો આભાર. WHO ગ્લોબલ હેલ્થ અને યુનિવર્સલ હેલ્થ કવરેજમાં ભારતની અગ્રણી ભૂમિકાનું સ્વાગત કરે છે.

પ્રધાનમંત્રી કાર્યાલય તરફથી જાહેર એક નિવેદનમાં કહેવાયું હતું કે, પીએમ મોદીએ કોવિડ-19 મહામારીમાં દુનિયાભર વચ્ચે સમન્વય બનાવવાને લઈને WHOના મહત્વપૂર્ણ યોગદાનની પ્રશંસા કરી. તેમણે કહ્યું કે, આ દરમિયાન અન્ય બીમારી સામે લડાઈ નબળી નથી પડવા દેવાની અને વિકાસશીલ દેશોમાં સ્વાસ્થ્ય સહયોગના મહત્વનો ઉલ્લેખ કર્યો.

રિલીઝમાં કહેવાયું છે કે પીએમ મોદીએ સ્વાસ્થ્ય સંગઠનના પ્રમુખને 13 નવેમ્બરે આયુર્વેદ દિવસ પર 'Ayurveda for COVID-19' થીમ અંતર્ગત કરાઈ રહેલા આયોજનની પણ વાત કરી.