કોરોનાની આ દવાને લઈને હતો ઉત્સાહ, WHOએ હવે તેને જ 'લિસ્ટ'માંથી કરી બહાર

જિનેવાઃ કોરોનાની જે દવાને લઈને ઉત્સાહ હતો તેના પર હવે WHOએ ઠંડુ પાણી રેડ્યું છે. વિશ્વ સ્વાસ્થ્ય સંગઠન એટલે કે WHOએ શુક્રવારે કોરોના વાયરસના દર્દીઓની સારવારમાં ઉપયોગમાં લેવાતી એન્ટી વાયરલ દવા રેમડેસિવીરને ઓફિશ્યિલ દવાઓના લિસ્ટમાંથી બહાર કરી છે. નોંધનીય છે કે WHOએ અગાઉ પણ દાવો કર્યો હતો કે રેમડેસિવીરથી હળવા અથવા તો ગંભીર લક્ષણ ધરાવતા દર્દીઓ સ્વસ્થ થાય તેવા કોઈ જ સબૂત મળ્યા નથી.

WHOએ 'દવાઓના લિસ્ટ'માંથી કરી બહાર
WHOએ શુક્રવારે કહ્યું કે, હોસ્પિટલમાં કોવિડ-19ના દર્દીઓની સારવારમાં ઉપયોગમાં લેવામાં આવતી દવાઓ સામે માર્ગદર્શન જાહેર કર્યા પછી વિકાસશીલ દેશો દ્વારા ખરીદી કરાતી બેંચમાર્ક તરીકે ઉપયોગમાં આવતી રેમડેસિવીરને દવાઓના કથિત પ્રિક્વોલિફિકેશન લિસ્ટમાંથી બહાર કરી છે.

દવાના કારણે મૃત્યુદર ઘટ્યો હોય તેવી સાબિતી નહીં
તારિક જસારેવિકે રૉયટર્સને મોકલેલા ઈમેઈલના જવાબમાં કહ્યું કે,'હાં અમે તેને (રેમડેસિવિર) PQ (પ્રિક્વોલિફિકેશન લિસ્ટ)માંથી સસ્પેન્ડ કરી છે.'તેમણે એ પણ ઉમેર્યુ હતું કે "દવાનું સસ્પેન્શન એવા દેશો માટે સંકેત છે કે WHO કોરોનાની સારવાર માર્ગદર્શિકાના પાલનમાં કોવિડ માટે આ દવા ખરીદવાની ભલામણ કરતું નથી." તાજેતરની જ નવી ગાઈડલાઈન્સમાં કહેવામાં આવ્યું હતું કે પેનલને રેમડેસિવીરના ઉપયોગમાં એવા કોઈ સબૂત નથી મળ્યા જેથી એવું ખબર પડે કે દવાના કારણે મૃત્યુદર ઘટ્યો હોય.

કોરોનાના દર્દીઓની સારવારમાં થતો હતો ઉપયોગ
નોંધનીય છે કે રેમડેસિવીરને પહેલા તો ઈબોલા વાયરસ સામે લડવા માટે બનાવવામાં આવી હતી પરંતુ દવાને વધારે સફળતા મળી નહોતી. જે પછી આ દવા કોરોનાના દર્દીઓ પર પણ ઉપયોગમાં લેવામાં આવતી હતી. કેટલીક ટ્રાયલ્સમાં ઉત્તમ પરિણામ આવ્યા પછી દુનિયાના અનેક દેશોમાં કોરોનાના દર્દીઓની સારવારમાં રેમડેસિવીરનો જ ઉપયોગ કરવામાં આવતો હતો. આ પહેલા WHOની ગાઈડલાઈન ડેવલપમેન્ટ ગ્રુપ (GDG) પેનલે કહ્યું કે તેની ભલામણ એક એવિડેન્સ રિવ્યૂ પર આધારિત છે. જેમાં 7000 કરતા વધારે દર્દીઓનો ટ્રાયલ ડેટાનો સમાવેશ થાય છે.