કોરોનાનું ઉદ્દભવ સ્થાન શોધવા વુહાનના વેટ માર્કેટ પહોંચી WHOની ટીમ

વુહાનઃ વર્લ્ડ હેલ્થ ઓર્ગેનાઈઝેશન (ડબલ્યુએચઓ)ની એક ટીમ કોરોના વાયરસના ઉદ્દભવ સ્થાનની તપાસ માટે હાલમાં ચીનમાં છે. આ ટીમે રવિવારે ચીનના હુબેઈ પ્રાંતની રાજધાની વુહાનના તે બજારની મુલાકાત લીધી હતી જેને કોરોના વાયરસનું ઉદ્દભવ સ્થાન માનવામાં આવી રહ્યું છે. એક વર્ષ અગાઉ વુહાનના આ જ સીફૂડ માર્કેટમાંથી કોરોના વાયરસના ચેપની ખબર પડી હતી.

ડબલ્યુએચઓની ટીમ હન્નાન સીફૂડ માર્ટેકની મુલાકાત લેવા પહોંચી જેને ગત વર્ષે જાન્યુઆરીમાં જ સીલ કરી દેવામાં આવ્યું હતું. ટીમના સભ્યોને ચારેય તરફથી ઘેરાબંધી ધરાવતા આ પરિસરમાં લઈ જવામાં આવ્યા હતા. જોકે, અન્ય કોઈને અંદર જવાની મંજૂરી મળી ન હતી.

ડબલ્યુએચઓની ટીમ ઘણા સમય પહેલા જ કોરોનાની તપાસ માટે ચીન જવાની હતી અને આ માર્કેટની તપાસ કરવાની હતી. જોકે, ચીન વારંવાર તેમાં અવરોધ ઊભા કરી રહ્યું હતું. ટીમ ચીન પહોંચી ત્યારે તેમને 14 દિવસ સુધી ક્વોરેન્ટીન કરવામાં આવી હતી. નિષ્ણાતો તે શોધવાનો પ્રયાસ કરી રહ્યા છે કેવી રીતે આ વાયરસ જાનવરો ખાસ કરીને ચામાચિડીયામાંથી માણસોમાં ફેલાયો છે.

જોકે, ડબલ્યુએચઓની તપાસ હજી પ્રારંભિક સ્તરે જ છે. ટીમના સભ્યો પણ વાયરસના સ્ત્રોતની ઓળખ કરવાની આશાને લઈને વધારે ઉત્સાહિત નથી. કોવિડ-19ના આ વાયરસે વિશ્વભરમાં 20 લાખથી વધારે લોકોનો જીવ લીધો છે. તેનાથી વૈશ્વિક અર્થવ્યવસ્થાને મોટો ફટકો પડ્યો છે. વેટ માર્કેટની મુલાકાત બાદ જ્યારે મીડિયાએ નિષ્ણાતોને સવાલ કર્યા ત્યારે તેમણે કોઈ જવાબ આપ્યો નથી. સુરક્ષાકર્મીઓએ મીડિયાને ત્યાંથી જતા રહેવાનું કહ્યું હતું.

એક મીડિયા કર્મીએ જ્યારે બૂમ પાડીને પૂછ્યું હતું કે શું ડબલ્યુએચઓના નિષ્ણાતોને ચીનના આ વેટ માર્કેટ સુધી જવાની મંજૂરી મળી તેનાથી તેઓ સંતુષ્ટ છે તે સવાલ કર્યો ત્યારે એક સભ્યએ હાથ ઉઠાવીને સાંકેતિક સહમતી વ્યક્ત કરી હતી. ચીનના સરકારી મીડિયા સંગઠન ગ્લોબલ ટાઈમ્સે ગત સપ્તાહે એક રિપોર્ટ પ્રકાશિત કર્યો હતો જેમાં હુન્નાનને કોરોના વાયરસનું કેન્દ્ર માનવાની વાતને અયોગ્ય ગણાવ્યું હતું. તેમાં કહેવામાં આવ્યું હતું કે સતત થયેલી તપાસથી ખ્યાલ આવે છે કે બજારથી કોરોના વાયરસનો વિસ્ફોટ થયો ન હતો.