એક સમયે જ્યાં સફાઈ કર્મચારી તરીકે કામ કર્યું હવે ત્યાં જ Boss બની મહિલા

રશિયાની ચૂંટણીની ચર્ચા વિશ્વભરમાં થઈ રહી છે અને તે પાછળનું કારણ છે એક મહિલા ઉમેદવાર. હકીકતમાં, આ મહિલા જે ઓફિસમાં છેલ્લા પાંચ વર્ષથી સફાઈ કામદાર તરીકે કામ કરતી હતી હવે તે જ ઓફિસમાં બોસ બની કામ કરશે. મહિલાનું નામ મરિના ઉદોદસ્કાયા છે. જેણે સાબિત કરી આપ્યું કે, નસીબ ગમે ત્યારે બદલાઈ શકે છે.

ગમે ત્યારે બદલાઈ શકે છે નસીબ
રિપોર્ટ અનુસાર, રશિયામાં સ્થાનિક ચૂંટણીમાં થયેલા મોટા ઉલટફેરના કારણે આવું શક્ય બન્યું હતું. હકીકતમાં, આ ચૂંટણીમાં રશિયાના રાષ્ટ્રપતિ વ્લાદિમીર પુટિનની પાર્ટીના નિકોલાઈ સામે કોઈ ઉમેદવાર ઉભો રહ્યો નહોતો. તેથી, ચૂંટણી પ્રક્રિયામાં પારદર્શિતા બતાવવા નિકોલાઈએ તેમની જ ઓફિસમાં કામ કરનાર 35 વર્ષની મરીનાને તેની સામે જ ચૂંટણી લડવા માટે ઉભી કરી હતી.


155 કિલોમીટર વિસ્તારની સંભાળશે જવાબદારી
પરંતુ નિકોલાઈને એ વાતનો જરાસરખો પણ ખ્યાલ નહોતો કે તેણે ચૂંટણીમાં જેને સામે ઉભી રાખી છે. તેનાથી જ હારી જશે. હવે આ અનોખી જીત સાથે મરિના 155 કિલોમીટર સુધી ફેલાયેલા પોવલિકા જિલ્લાની જવાબદારી સંભાળશે અને એક સમયે તે જ્યાં સફાઈ કર્મચારી તરીકે કામ કરતી તે ઓફિસની જ બોસ બનશે.

ઐતિહાસિક રહી ચૂંટણી
નોંધનીય છે કે, મરિનાએ 62 ટકા મતો મેળવીને નિકોલાઈને હરાવી હતી. રસપ્રદ વાત એ છે કે મરિનાએ ચૂંટણી પ્રચાર પણ નહોતો કર્યો. મરિના હવે આ પોસ્ટની જવાબદારી સમજતા કામ કરવાની પણ યોજના બનાવી રહી છે. અલબત્ત, આ ચૂંટણી જ ઐતિહાસિક હતી. જેના પરિણામો ઈતિહાસમાં નોંધાઈ ગયા છે. Feature Image: Photo/getty images