વોશિંગ્ટન: દુનિયામાં કોરોનાના સૌથી વધુ કેસ ધરાવતા દેશ અમેરિકાના પ્રમુખ ડોનાલ્ડ ટ્રમ્પે કોરોનાને લઈને મોટી ચેતવણી આપી છે. વ્હાઈટ હાઉસમાં લગભગ અઢી મહિના બાદ પત્રકારો સાથે વાત કરતા ટ્રમ્પે કહ્યું હતું કે કોરોનાનો કહેર હજુય ચાલુ જ રહેવાનો છે. તેમણે ત્યાં સુધી કહ્યું હતું કે આ વાયરસ કાબૂમાં આવે તે પહેલા સ્થિતિ ઓર ખરાબ થશે. ટ્રમ્પે કહ્યું હતું કે આખી દુનિયામાં આ વાયરસ હજુય ગંભીર તબક્કામાં પહોંચશે.
મંગળવાર સુધીમાં અમેરિકામાં કોરોનાના અત્યારસુધી નોંધાયેલા કુલ કન્ફર્મ કેસનો આંકડો 38 લાખ પર પર થયો હતો. દેશમાં અત્યારસુધી કોરોનાને કારણે 1.41 લાખ લોકોના મોત થઈ ચૂક્યા છે. અમેરિકા બાદ બ્રાઝિલ 21 લાખ કેસ સાથે બીજા નંબર પર છે. ટ્રમ્પે અમેરિકનોને અપીલ કરી હતી કે જ્યાં સુધી વાયરસની દવા કે રસી ના શોધાય ત્યાં સુધી માસ્ક પહેરો અને બાર જેવી ભીડભાડવાળી જગ્યા પર જવાનું ટાળો.
ટ્રમ્પે તાજેતરમાં જ ટ્વીટ કરીને માસ્ક પહેરવાને દેશભક્તિ ગણાવી હતી, અને પોતાના માસ્ક પહેરેલા ફોટોગ્રાફ્સ પણ શેર કર્યા હતા. તેમણે એવું પણ કહ્યું હતું કે નવેમ્બરમાં જ્યારે દેશમાં ચૂંટણી યોજાવાની છે ત્યારે લોકો તેમનું કોરોનાને કાબૂમાં કરવા તેમણે કરેલી કામગીરીને આધારે મૂલ્યાંકન ના કરે.