ચીનની પીળી ધૂળથી ફેલાઈ શકે કોરોના, ઉત્તર કોરિયાએ નાગરિકોને આપી ચેતવણી

પ્યોંગયોંગ: ચીનના પાડોશી દેશ ઉત્તર કોરિયાએ પોતાના નાગરિકોને ઘરમાં જ રહેવાની સલાહ આપી છે. જેમાં જણાવાયું છે કે આ સીઝનમાં ચીનથી પીળી ધૂળ ઉડીને ઉત્તર કોરિયા તરફ આવે છે, અને તેના કારણે કોરોના ફેલાવાનો ખતરો રહેલો છે.

કોરિયાના સત્તાવાર અખબાર રોડોંગ સિન્મનમાં જણાવાયું છે કે, આખી દુનિયામાં કોરોનાનો બીજો રાઉન્ડ શરુ થયો હોય તેમ ફરી કેસો વધી રહ્યા છે, તેવામાં તેવામાં ચીનમાંથી હવામાં ઉડીને આવતી પીળી ધૂળથી બચવું જરુરી છે.

સરકારી ટીવી ચેનલ KRTએ પણ બુધવારે એવા અહેવાલ પ્રસિદ્ધ કર્યા હતા કે યલો ડસ્ટમાં હેવી મેટલ્સ તેમજ કોરોના વાયરસ હોઈ શકે છે. તેવામાં બહારથી ઘરે આવતા લોકોએ હાઈજિનનું ખાસ ધ્યાન રાખવું, અને કામદારોએ આઉટડોર કન્સ્ટ્રક્શનનું કામ ના કરવું.

જોકે, ઉત્તર કોરિયા ચીનની જે પીળી ધૂળની વાત કરી રહ્યું છે તે ચીનના ગોબીના રણમાંથી આવે છે. આ રણ ઉત્તર કોરિયાથી 1900 કિલોમીટર દૂર આવેલું છે. જેથી આ ધૂળની સાથે ઉત્તર કોરિયામાં કોરોના વાયરસ ફેલાઈ શકે છે તેવો દાવો સાચો માનવા એક્સપર્ટ્સ તૈયાર નથી.

છ ફુટના સોશિયલ ડિસ્ટન્સિંગથી પણ કોરોના સામે રક્ષા મળે છે, ત્યારે 1900 કિમી દૂરથી વાયરસ ધૂળ સાથે ભળીને ચીનથી ઉત્તર કોરિયા આવી પહોંચે તેવી વાતમાં કોઈ દમ નથી.

જોકે, ઉત્તર કોરિયાએ પોતાના નાગરિકોને કામ વગર ઘરની બહાર ના નીકળવા જણાવ્યું છે, અને જો બહાર જવાનું થાય તો માસ્ક પહેરવા સહિતની તકેદારી રાખવા કહેવાયું છે.

ઉત્તર કોરિયામાં હજુ સુધી કોરોનાનો કોઈ કન્ફર્મ કેસ નથી નોંધાયો. જોકે, તેના આ દાવાને પણ એક્સપર્ટ્સ સાચો માનવા તૈયાર નથી. ઉ. કોરિયાએ કોરોનાને ફેલાતો અટકાવવા બોર્ડર સીલ કરવાની સાથે ક્વોરન્ટાઈનને લગતા સખ્ત નિયમો લાગુ કર્યા છે.